எதிர்பார்ப்பை எகிற வைத்த ‘நிபுணன்’ டிரையிலர்

M‘ஒரு மெல்லிய கோடு’ படத்திற்கு பிறகு ‘ஆக்ஷன் கிங்’ அர்ஜுன் கதையின் நாயகனாக நடித்துள்ள படம் ‘நிபுணன்’. இது தவிர ‘காதலின் பொன் வீதியில்’ எனும் படத்தை விறுவிறுப்பாக தயாரித்து, இயக்கி வருகிறார்.

இதில் ஆக்ஷன் த்ரில்லராக தயாராகி வரும் ‘நிபுணன்’, அர்ஜுனின் 150-வது படமாம். இதனை ‘அச்சமுண்டு அச்சமுண்டு’ புகழ் அருண் வைத்யநாதன் இயக்குகிறார். அர்ஜுனுடன் பிரசன்னா, வைபவ், வரலட்சுமி சரத்குமார், ஸ்ருதி ஹரிஹரன், உமா ரியாஸ்கான் ஆகியோர் மிக முக்கிய வேடங்களில் நடித்துள்ளனராம்.

எஸ்.நவீன் இசையமைத்துவரும் இதற்கு அர்விந்த் கிருஷ்ணா ஒளிப்பதிவு செய்துள்ளார், சதீஷ் சூர்யா படத்தொகுப்பாளராக பணியாற்றுகிறார். ‘பேஷன் ஸ்டுடியோஸ்’ நிறுவனம் சார்பில் இயக்குநர் அருண் வைத்யநாதன், உமேஷ் - சுதன் சுந்தரம் - ஜெயராம் ஆகியோருடன் இணைந்து தயாரிக்கிறார்.
இதன் போஸ்ட் புரொடக்ஷன் பணிகள் முடிவடையும் தருவாயில் உள்ளதாம். சமீபத்தில் படக்குழுவால் ட்விட்டப்பட்ட படத்தின் போஸ்டர்ஸ், டைட்டில் டீசர் மற்றும் ஃபர்ஸ்ட் லுக் டீசர் ரசிகர்களிடையே நல்ல வரவேற்பை பெற்றது.

‘சூப்பர் ஸ்டார்’ ரஜினிகாந்த் உட்பட பல திரையுலக நட்சத்திரங்கள் டீசரை பார்த்து பாராட்டி ட்விட்டினார்கள். தற்போது, படத்தின் மிரட்டலான டிரையிலரை வெளியிட்டுள்ளது படக்குழு. 1 நிமிடம் 35 நொடிகள் ஓடும் இந்த டிரையிலர் ரசிகர்களிடம் செம லைக்ஸ் குவித்து வைரலாகி வருகிறது.

அதுமட்டுமின்றி, படத்தின் மீதான எதிர்பார்ப்பையும் அதிகரிக்கச் செய்துள்ளது. படத்தை தமிழில் ‘நிபுணன்’ என்றும், கன்னடத்தில் ‘விஷ்மயா’ என்ற பெயரிலும், தெலுங்கில் ‘குருக்ஷேத்ரம்’ எனவும் வருகிற ஜூலை 7-ஆம் தேதி ரிலீஸ் செய்யத் திட்டமிட்டுள்ளது ‘நிபுணன்’ டீம்.