பிரபல நடிகையும் காங்கிரஸ் கட்சியின் செய்தி தொடர்பாளருமான குஷ்புவின் வீட்டில் வெடிகுண்டு வைக்கப்பட்டதாக வந்த அநாமதேய தொலைபேசி அழைப்பு காரணமாக பரபரப்பு ஏற்பட்டுள்ளது.
நடிகை குஷ்பு தனது குடும்பத்தினருடன் சென்னை பட்டினப்பாக்கத்தில் உள்ள அவரது வீட்டில் வசித்து வருகிறார்.
இந்நிலையில், வௌ்ளிக்கிழமை இரவு அவரது வீட்டில் வெடிகுண்டு வைக்கப்பட்டுள்ளதாக தேனாம்பேட்டை பிரிவு 108 அம்பியுலன்ஸ் சேவை மையத்துக்கு அநாமதேய தொலைபேசி அழைப்பு ஒன்று வந்தது.
அதில் பேசிய நபர், நடிகை குஷ்புவின் பட்டினப்பாக்கம் வீட்டில் வெடிகுண்டு வைத்திருப்பதாக மிரட்டியுள்ளார். இதனால், உடனடியாக உஷாரான பொலிஸார் நள்ளிரவு குஷ்புவின் பட்டினப்பாக்கம் வீட்டுக்குச் சென்று சோதனை நடத்தினர். பின்னர் நடத்திய விசாரணையில், வெடிகுண்டு மிரட்டல் வெறும் புரளி எனத் தெரியவந்தது.
இதனையடுத்து, மிரட்டல் விடுத்த மர்ம நபர் யார் என பொலிஸார் தீவிர விசாரணை மேற்கொண்டு வருகின்றனர். மேலும் குஷ்பு தற்போது குடும்பத்தினருடன் வெளிநாட்டு சுற்றுலா பயணத்தில் உள்ளார் என்பது குறிப்பிடத்தக்கது.
Post A Comment: